скачать doc
ҚАЗАҚСТАН РЕСПУБЛИКАСЫ БІЛІМ ЖӘНЕ ҒЫЛЫМ МИНИСТРЛІГІ
Ы.АЛТЫНСАРИН АТЫНДАҒЫ ҰЛТТЫҚ БІЛІМ БЕРУ АКАДЕМИЯСЫ
ФИЗИКА
ОҚУ БАҒДАРЛАМАСЫ
10-11 сыныптар
қоғамдық –гуманитарлық бағыт
Аcтана 2010
ҚАЗАҚСТАН РЕСПУБЛИКАСЫ БІЛІМ ЖӘНЕ ҒЫЛЫМ МИНИСТРЛІГІ
Ы.АЛТЫНСАРИН АТЫНДАҒЫ ҰЛТТЫҚ БІЛІМ БЕРУ АКАДЕМИЯСЫ
ФИЗИКА
жалпы орта білім беретін мектептің қоғамдық-гуманитарлық бағытындағы 10-11 сыныптарына арналған
ОҚУ БАҒДАРЛАМАСЫ
Астана 2010
Қазақстан Республикасы Білім және ғылым министрінің 09.07.2010 жылғы №367 бұйрығымен бекітілген
Бағдарлама авторлары: Тоқбергенова У.Қ,Қазақбаева Д.М, Башарұлы Р, Байжасарова Ғ. З.
Жалпы білім беретін мектептің қоғамдық-гуманитарлық бағыттағы 10-11 сыныптарына арналған «Физика» оқу бағдарламасы .– Астана, 2010. – 14 б.
© Ы.Алтынсарин атындағы
Ұлттық білім беру академиясы, 2010
І. ТҮСІНІК ХАТ
Табиғаттың жалпы заңдары туралы ғылым болып табылатын физика, мектепте оқу пәні ретінде қоршаған дүние туралы білім жүйесіне елеулі үлес қосады. Ол қоғамның экономикалық және мәдени дамуындағы ғылымның рөлін түсінуге, қазіргі заманғы ғылыми дүниетанымның қалыптасуына ықпал етеді.
Мектептегі физикалық білім беру беру мазмұнының даму тенденциясы физикалық ғылымның ғарыштық құбылыстар, Жер қойнауы мен планеталардағы құбылыстар, тіршілік дүниесіндегі және тірі объектілердің қасиеттері (биофизика, молекулалық биология), ақпараттық жүйе (шала өткізгіштік, ЭЕМ-нің негізі ретіндегі лазерлік және криогендік техника) салаларындағы зерттеу объектілерінің кеңеюімен байланысты.
Қоғамдық-гуманитарлық бағыттағы сыныптарға (10-11-сыныптар) арналған “Физика” оқу пәнiнің мазмұны мәдениеттiң құрамды бөлiгi ретiндегi физика туралы, әлемнiң физикалық бейнесi жөнiнде, физика ғылымының даму жолдары мен кезеңдерi жайлы және физика дамуының қоғамның, экономиканың, жалпы адамзаттық мәдениеттiң дамуымен, тұтас алғанда философиялық идеялардың, ғылыми ақиқатқа деген философиялық көзқарастың дамуымен байланысы туралы оқушылардың түсiнiгiн қалыптастыруға; өз бетiнше ойлау, өз бетiнше бiлiм алу дағдыларын, шығармашылық қабiлеттіліктерін, адамның дүниеге қатынасын айқындайтын әлеуметтiк мәнi бар бағдарларды дамытуға әсер етуi тиiс.
Қоғамдық-гуманитарлық бағыттағы 10-11-сыныптарға арналған «Физика» оқу пәнін оқытудың басты мақсаттары – оқушыларда ғылыми дүниетаным негіздерін, әлемнің ғылыми-жаратылыстанымдық бейнесін біртұтас қабылдай алуды қалыптастыруға, құндылық бағдарларды тәрбиелеуге ықпал ету.
Оқу пәнін оқытудың мiндеттерiне мыналар кiредi:
– физика ғылымының негiзi болып табылатын эксперименттiк деректер, ұғымдар, заңдар, теориялар және олардың практикалық қосымшалары жайлы бiлiм беру;
– физика ғылымының негiзгi әдiстерi – теориялық және эксперименттiк әдiстермен таныстыру;
– құралдарды, аспаптарды пайдалана бiлу, эксперимент нәтижелерiн өңдеу сияқты эксперименттiк дағдыларды қалыптастыру;
– өз бетiнше бiлiм алу, физикалық құбылыстарды бақылау және түсiндiре алу бiлiктiлiктерiн қалыптастыру;
– оқушылар бойына физика ғылымына деген шынайы құрмет пен сүйiспеншiлiктi дарыту, олардың танымдық және шығармашылық қабiлеттерiн дамыту.
Қоғамдық-гуманитарлық бағыттағы 10-11-сыныптарға арналған «Физика» пәнінің мазмұны іргелі физикалық теориялардың динамикалық түрде дамитын жүйесі ретіндегі дүниенің ғылыми-физикалық бейнесі туралы шынайы көзқарас қалыптастыруға бағытталған тұжырымдық идеяға сәйкес анықталады. Физиканың мазмұны осы іргелі теориялар төңірегіне топтастырылады.
«Физика» пәні бойынша білім беру мазмұны ғылымилық, жүйелілік, түсініктілік, біртұтастық, сабақтастық сияқты принциптер негізінде таңдалып алынған.
Қазақстан Республикасы мемлекеттік жалпыға міндетті бастауыш, негізгі, жалпы орта білім беру стандартының негізгі ережелерінің Типтік оқу жоспарына сәйкес (2010 ж.) физиканы қоғамдық-гуманитарлық бағыттағы сыныптарда оқытуға бөлінетін апталық сағат саны:
10-11 сыныптарда аптасына 2 сағатты, оқу жылында 68 сағатты, оның ішінде:
10 сыныпта – аптасына 1 сағатты, оқу жылында 34 сағатты,
11 сыныпта – аптасына 1 сағатты, оқу жылында 34 сағатты құрайды.
Оқу пәні мазмұнының вариативті бөлігі таңдау курстары бойынша оқу бағдарламаларын жасауға және жүзеге асыруға бағытталған. Оқыту бағдарына тәуелсіз, физикаға және оның қолданбалы аспектілеріне қызығушылық білдірген оқушыларға мектеп физикадан таңдау курстарын енгізу арқылы пәнді зерделеуге бөлінетін сағат сандарын ұлғайта алады.
Келесі қосымша оқу бағдарламалары ұсынылады: «Ғарыш физикасы», «Физика және экология», «Радиотехника және электроника негіздері», «Биофизика», «Физика және Қазақстан энергетикасы», «Физикалық процестерді компьютерлік модельдеу технологиясы» және т.б.
ІІ. ОҚУ ПӘНІНІҢ БАЗАЛЫҚ МАЗМҰНЫ
10 сынып
(барлығы 34 сағат, аптасына 1 сағаттан)
Кiрiспе (2 сағат)
Әлемдi танып-бiлудiң ғылыми әдiстері. Физика – табиғаттың қарапайым және iргелi қасиеттерi туралы ғылым.
МЕХАНИКА
Кинематиканың негiзгi ұғымдары (5 сағат)
Механикалық қозғалыс. Денелер қозғалысын сипаттау әдiсi. Галилео Галилей. Бірқалыпты түзусызықты қозғалыс. Түзусызықты теңүдемелi қозғалыс және шеңбер бойымен бiрқалыпты қозғалыс. Механикадағы салыстырмалы және инвариантты шамалар.
Қозғалыс заңдары (5 сағат)
Исаак Ньютон және қозғалыс заңдары. Табиғаттағы күштер. Жердiң жасанды серiктерi.
Сақталу заңдары (3 сағат)
Дене импульсi. Импульстiң сақталу заңы. Реактивтi қозғалыс. Энергия және жұмыс. Энергияның сақталу заңы.
Сұйықтар мен газдардың қозғалысы (2 сағат)
Идеал сұйықтың қозғалысы. Тұтқыр сұйық. Денелердiң аққыштығы. (Ньютон механикасының қолданылу шекарасы.)
МОЛЕКУЛАЛЫҚ ФИЗИКА
Молекулалық-кинетикалық теорияның негiзгi қағидалары және оларды тәжiрибелiк негiздеу (3 сағат)
Зат құрылысы туралы көзқарас. Молекулалық-кинетикалық теорияның негiзгi қағидалары. Молекуланың мөлшерi мен массасы. Молекулалардың өзара әрекеттесуi. Молекулалардың қозғалысы. Газ молекулаларының қозғалыс жылдамдығы. Штерн тәжiрибесi.
Идеал газдың молекулалық-кинетикалық теориясы (5 сағат)
Идеал газ. Идеал газдың молекулалық-кинетикалық теориясының негiзгi теңдеуi. Температура зат бөлшектерінің жылулық қозғалысының орташа кинетикалық энергиясының өлшемі ретінде.
Газ заңдары. Идеал газ күйiнiң теңдеуi.
Термодинамика негiздерi (5 сағат)
Жылудың табиғаты. Термодинамиканың бiрiншi заңы және оны термодинамикалық процестерге қолдану. Табиғаттағы жылу процестерiнiң қайтымсыздығы. Термодинамиканың екiншi заңы. Жылу қозғалтқыштары және қоршаған ортаны қорғау.
Лабораториялық жұмыстар:
Тең үдемелi қозғалыс кезiндегi дененiң үдеуiн анықтау.
Сырғанау үйкелiс коэффициентiн анықтау.
Бойль-Мариотт заңын тәжiрибелiк тексеру.
Көрсетiлiмдер
Қозғалыстың салыстырмалылығы.
Механикалық қозғалыстың түрлерi.
Стробоскоп.
Спидометр.
Денелердiң ауада және сиретiлген ортада (Ньютон түтiкшесiнде) түсуi.
Инерцияның байқалуы.
Күштердi өлшеу.
Импульстiң сақталу заңы.
Реактивтi қозғалыс.
Зымыранның моделi.
Броундық қозғалыстың механикалық моделi.
Диффузияны бақылау.
Судың төменгi қысымда қайнауы.
Газ заңдары.
Жалпылау сабақтары (2 сағат)
Уақыт қоры (2 сағат)
11 сынып
(барлығы 34 сағат, аптасына 1 сағаттан)
ЭЛЕКТРОДИНАМИКА
Электростатика (4 сағат)
Электр өрiсi туралы iлiмнiң дамуы. Электрлiк өзара әрекеттесу. Электр заряды. Электр зарядының сақталу заңы. Кулон заңы. Электр өрiсi. Электр өрiсiнiң кернеулiгi және потенциал. Өрістердің суперпозициясы. Электр сыйымдылық. Электр өрiсiнiң энергиясы.
Тұрақты электр тогы (3 сағат)
Электр тогы туралы түсiнiктердiң даму тарихы. Токтың бар болу шарттары. Тiзбектiң бөлiгi және толық тiзбек үшiн Ом заңы. Электр тогының жұмысы. Джоуль-Ленц заңы. Металдар өткiзгiштiгiнiң электрондық теориясының негiздерi. Джоуль-Ленц және Ом заңдарын электрондық теория тұрғысынан түсiндiру.
Электромагнетизм (3 сағат)
Магнетизм туралы iлiмнiң тарихы. Магнит өрiсi. Токтардың өзара әрекеттесуі. Ампер күшi. Магнит индукциясы. Лоренц күшi. Ампер және Лоренц күштерiн қолдану. Заттардың магниттiк қасиеттерi және оларды қолдану. Аспан денелерiнiң магниттiк өрiстерi.
Электромагниттiк тербелiстер мен толқындар (4 сағат)
Электромагниттiк өрiс бейнесi қалай туындады. Электромагниттiк индукция заңы. Индукциялық ток. Айнымалы ток туралы ұғым. Электромагниттiк индукция құбылысын пайдалану. Электромагниттiк өрiс. Электромагниттiк өрiстiң энергиясы. Электромагниттiк толқын. Жарықтың электромагниттiк табиғаты. Электромагниттiк толқындар шкаласы. Жарықтың толқындық қасиеттерi және олардың байқалуы.
Электромагниттiк толқындарды пайдалану: радиобайланыс және теледидар. Радиолокация. Желілі технологиялар және Интернет. Әлемнiң электродинамикалық бейнесi.
ҚАЗIРГI ЗАМАНҒЫ ФИЗИКА
Салыстырмалылықтың арнайы теориясының элементтерi (3 сағат)
Жарық жылдамдығы. Әлемдiк эфир проблемасы. Салыстырмалылықтың арнайы теориясының постулаттары. Салыстырмалылықтың арнайы теориясының постулаттарынан туындайтын кейбiр салдарлар. Масса мен энергияның өзара байланыс заңы. Релятивтiк және классикалық механика.
Жарықтың кванттық теориясының негiздерi (3 сағат)
Жарық табиғаты туралы түсiнiктердiң дамуы. Жарықтың корпускулалық және толқындық теориясы. Кванттық теория туралы ұғым. Фотоэлектрлiк эффект. Фотоэффект үшiн Эйнштейн теңдеуi. Жарықтың кванттық теориясы негiзiнде фотоэффект заңдарын түсiндiру. Фотон және оның сипаттамасы. Жарық қысымы. Электромагниттiк сәуле шығарудың толқындық және корпускулалық қасиеттерiнiң диалектикалық бiрлiгi.
Атом және атом ядросы (5 сағат)
Электронның ашылуы. Рентген және Беккерель ашқан жаңалықтар. Радиактивтi элементтер. Резерфордтың радиактивтi сәуле шығарудың табиғатын анықтайтын тәжiрибелерi. Радиактивтi ыдырау заңы. Атомның Дж. Томсон жасаған моделi. Атом құрылысын анықтаудағы Резерфорд тәжiрибелерi. Атомның планетарлық моделi. Ядролардың түрленуi. Атом спектрi. Спектрлiк талдау. Бор постулаттары. Бор бойынша сутегi атомы. Лазер әрекетiнiң физикалық негiзi. Де Бройль гипотезасы. Гейзенбергтiң анықталмағандықтар қатынасы. Нейтронның ашылуы. Ядроның протон-нейтрондық моделi. Ядролық күштер. Ядролық реакциялар. Байланыс энергиясы. Бөлiну және синтезделудiң ядролық реакциялары. Атом энергиясының болашағы. Термоядролық синтез проблемалары.
Әлем. Элементар бөлшектер - Әлем кеңiстiгiнiң кiрпiштерi (3 сағат)
Әлемнiң құрылысы туралы тарихи түсiнiктер. Әлемнiң геоцентрлiк жүйесiнiң ақыры. Элементар бөлшектер - әлемдi құраушы кiрпiштер. Күннiң құрылысы. Жұлдыздар эволюциясы немесе әлем кеңiстiгiнiң тарихы туралы. Галактика, тұмандықтар және қара құрдымдар. Галактикаларды жiктеу. Әлемнiң қазiргi заманғы ғылыми бейнесi.
Жалпылау сабақтары (2 сағат)
Лабораториялық жұмыстар:
Өткiзгiштердi тiзбектей және параллель қосу заңдарын тексеру.
Магнит өрiсiнiң спектрлерi.
Магнит өрiсiнiң токқа әсерiн бақылау.
Электромагниттiк индукция құбылысын зерделеу.
Жарықтың интерференция және дифракция құбылыстарын бақылау.
Сәуле шығару және жұтылу спектрлерi.
Көрсетiлiмдер:
1. Электрленген денелердiң өзара әрекеттесуi.
2. Зарядталған шариктердiң электр өрiсi.
3. Параллель токтардың өзара әрекеттесуi.
Магнит өрiсiнiң токқа әсерi.
Электрон шоғының магнит өрiсiнде ауытқуы.
Электромагниттiк индукция.
Ленц ережесi.
Интерференциялық жолақтарды алу.
Жiңiшке жiптегi жарықтың дифракциясы.
Жарықтың поляризациялануы.
Электромагниттiк сәуле шығару шкаласы.
Қыздырылған дененiң спектрiндегi көрiнбейтiн сәулелер.
Фотоэффект.
Сыртқы фотоэффект заңдары.
Жарықтың химиялық әсерi.
Вильсон камерасы.
Бөлшектер тiркегiшi.
Уақыт қоры (4 сағат)
III. СЫНЫПТАР БОЙЫНША ОҚУШЫЛАРДЫҢ ДАЙЫНДЫҚ ДЕҢГЕЙІНЕ ҚОЙЫЛАТЫН ТАЛАПТАР
Қоғамдық-гуманитарлық бағытында оқитын 10-сынып оқушысы:
– механиканың (материялық нүкте, қатты дене, сұйықтар мен газдар кинематикасы мен динамикасы, сақталу заңдары), молекулалық физика мен термодинамиканың (молекулалы-кинетикалық теория, газдардың, сұйықтардың және кристалдардың қасиеттері) физикалық негіздерінің мәні мен мағынасын,
– табиғи жүйелердегі гравитациялық, электромагниттік өзара әрекеттесулердің, табиғаттағы динамикалық және статикалық заңдылықтардың, табиғаттағы физикалық объектілер құрылысының реттілігінің, реттіздіктен реттілікке және керісінше өтудің мәнін,
– жаңаратын және жаңармайтын әр түрлі табиғи қорларды тиімді пайдалану негіздерін, адамның белсенді іс-әрекетінен болатын табиғи объектілердегі физикалық заңдылықтарды; нанотехнологиялар негіздерін,
– физиканың дамуына елеулі ықпал еткен қосқан ғалымдардың (И.Ньютон – динамика заңдары және бүкіләлемдік тартылыс заңы, Л.Больцман, Р.Клаузиус, Л.Ландау, Н.Карно –термодинамика заңдары және т.б.) үлесін,
–табиғат құбылыстарындағы циклділік принциптерін және олардың себептерін (Күн циклдері, тасулар мен қайтулар және т.б.); табиғат құбылыстарының адам әрекетінен (жылыжай эффектісі әрекетінен жер бетінің қызуы, энергия өндірудің экологиялық проблемалары және т.б.) бұзылу мүмкіндігі туралы білуі және түсінуі тиіс;
– Қазақстанның энергетикалық қорларын, олардың көлікте, энергетикада, ауыл шаруашылығында, ғарышты игерудегі қолданысы бойынша практикалық мәнділігін сипаттай алуы,
– физикадан жаңа білімді игеру барысында ньютондық (классикалық) механиканың, газдардың кинетикалық теориясы, табиғаттағы динамикалық және статикалық заңдылықтар туралы түсініктеріне түзетулер енгізе алуы,
– физикалық құбылыстар мен денелердің қасиеттерін (аспан денелері мен Жердің жасанды серіктерінің қозғалысын, реактивті қозғалысты, газдардың, сұйықтар мен қатты денелердің қасиеттерін, нақты мысалдар арқылы инерциялық санақ жүйелерінің тең құқықтығын; жылулық процестердің қайтымсыздығын) сипаттап, түсiндiре алуы;
– кинематика және динамика заңдарын, газдардың, сұйықтардың, қатты денелердің жылулық ұлғаюы, температураға байланысты қатты заттардың серпімділік қасиеттерінің өзгеруі туралы игерген білімдерін күнделікті өмірде туындайтын проблемалық жағдаяттарды шешу үшін қолдана алуы тиіс.
Қоғамдық-гуманитарлық бағытында оқитын 11-сынып оқушысы:
– табиғаттағы дискреттілік және үздіксіздік, симметрия принциптері туралы;
– электромагниттік өріс және электродинамика заңдары (М. Фарадей, Д. Максвелл), кванттау, кванттық постулаттар туралы идеялар (М. Планк, Н. Бор); табиғи радиоактивтіліктің ашылуы, радиоактивті изотоптарды алу және оларды адамзаттың өркендеуі үшін қолдану, атомдық ядро және элементар бөлшектер физикасы саласындағы жаңалықтар туралы түсінік алуы тиіс;
- электр және магнетизмнің (вакуум мен заттағы айнымалы электр өрісі; Максвелл теориясы, электромагниттік толқындар, оның ішінде оптикалық диапазондағы да толқындардың таралу қасиеттері); релятивтік механиканың (жарық жылдамдығы, кеңістік пен уақыт, масса мен энергияның байланысы), кванттық физиканың (кванттық механикадағы бөлшектердің күйлері, корпускулалық-толқындық дуализм, ядролардың, атомдардың құрылысы), іргелі өзара әрекеттесулердің, табиғатты танып-білудің жаңадан ашылған ғылыми әдістерінің мүмкіндіктері) физикалық негіздерінің мән-мағынасын,
– радиоактивті сәуле шығарудың жануарлар мен өсімдіктер дүниесіне әсерін, бұл процестердің физикалық негіздерін білуі тиіс;
– игерген физикалық білімдері мен біліктіліктерін көлік құралдарын, тұрмыстық электр құралдарын (электр шайнегін, электр пешін, тоңазытқышты, ұялы телефонды, микротолқынды пешті), радио және телекоммуникациялық байланыс құралдарын пайдалау кезінде қауіпсіздікті қамтамасыз ету үшін пайдалана алуы;
– жаңа білімді игеру барысында тірі және өлі табиғатта жүріп жататын процестер мен құбылыстар, зат пен өріс қасиеттері, кеңістік-уақыт заңдылық-тары, табиғаттың динамикалық және статистикалық заңдары, элементар бөлшектер және іргелі өзара әрекеттесулер, Әлемнің құрылысы мен эволюциясы туралы түсініктеріне түзетулер енгізе алуы,
– физикадан игерген білімдері мен тәжірибесін ядролық энергетиканың экологиялық проблемаларын шешу тәсілдерін бағалау үшін қолдана алуы;
– физикадан игерген теориялық және практикалық білімдерін (электродинамиканың энергетикада, әр түрлі электромагниттік сәуле шығарудың радио- және телекоммуникацияның дамуындағы, кванттық физиканың ядролық энергетиканың дамуындағы) адамзат қызметінің әр түрлі саласында қолдана алуы үшін басқа жаратылыстанымдық білімдерімен ұштастыра алуы тиіс.
IV. ОҚЫТУДЫҢ ӘДІСТЕМЕЛІК ЖҮЙЕСІНІҢ ЕРЕКШЕЛІКТЕРІ
Физика ғылым ретінде адамзат мәдениетінде маңызды орын алады. Өзінің мазмұнында деректерді, түсініктерді, заңдарды, теорияларды, модельдерді, іргелі тәжірибелерді, физика әдістерін және т.б. қамти отырып, адам қызметінің түрлі саласында кеңінен қолданыс табатын түсініктер, ойлау жүйесі мен практикалық қызметі үшін тиімді тәсілдер қоры жинақталады. Физиканың жалпы мәдени мәнділігін және оның негізінде ғылыми дүниетанымды және көзқарасты қалыптастыру қазіргі кездегі оқу пәнінің басым мақсаттарына жатады.
Курстың оқу материалы iргелi физикалық теориялар айналасына топтастырылған. Материалды осылай топтастыру гуманитарлық бағыттағы сынып оқушыларының оқу-танымдық iс-әрекетiнiң ерекшелiгiне байланысты және оларда теориялық ойлау элементтерiн, танымдағы теорияның рөлiне, теория мен эксперименттiң ара қатысына байланысты әдiснамалық бiлiм жүйесiн қалыптастыруға, физиканың дамуын қоғамның, оның мәдениетiнiң дамуымен байланыстыруға, тарихи тұрғыдан қарауға мүмкiндiк бередi. Бұл сонымен қатар қоғамдық-гуманитарлық бағыттағы сынып оқушыларының оқу-танымдық iс-әрекетiнiң сипатына (көрнекi-бейнелiк қабылдау мен ойлаудың басымдығы) сай келетiн материалды зерделеудiң эмпирикалық негiздерiн кеңейту мүмкiндiгiн қамтамасыз етедi. Жеке теориялар iргелi жалпы теорияларға бiрiгедi.
Қоғамдық-гуманитарлық бағыттағы пән мазмұнына оқу материалын зерделеу кезінде немесе курстың сәйкес бөлімдерін оқығаннан кейін қорытынды сабақтарда қалыптастырылуы мүмкін әдіснамалық білімдер жүйесі енгізілген. Оқушылар таным әдістері туралы білімді курс кіріспесінде, материалды зерделеу барысында және қорытынды сабақтарда алады.
Таным процесі туралы білім тарихи-ғылыми және тарихи-өмірбаяндық материалды енгізу жолымен қалыптастырылады, яғни курстың өне бойында жеке теориялардың дамуына негізгі үлесін қосқан ғалымдардың өмірбаянымен және еңбектерімен таныстыру көзделеді.
Ұсынылған бағдарламада физика тарихы, қолданбалы физика, физиканың экология және энергиямен қамтамасыз ету мәселелерін шешудегі рөлі, қазіргі заман физикасы, сондай-ақ техниканың әр түрлі салаларындағы физиканың қолданыстары жайлы материалдарға елеулі көңіл бөлінген.
Қоғамдық-гуманитарлық бағдарға арналған физика курсы бақылау жүргізе алу, болжамдар құру және қарапайым политехникалық дағдылармен қарулануды ескеретін зерттеушілік сипаттағы лабораториялық жұмыстарды ескереді. Ұсынылып отырған физика курсындағы астрономияның жеке мәселелері бөлек бөлім ретінде де, кейбiр физикалық тақырыптарды кеңейте қарастыру ретінде де берілді.
Қоғамдық-гуманитарлық бағыттағы 10-11-сыныптарға арналған физика пәнінің мазмұнын таңдау барысында әлеуметтiк тәжiрибе (ғылым ретiндегi физиканың мазмұны), оқу-танымдық iс-әрекеттiң жалпы заңдылықтары және оқыту процесi жайлы бiлiмдер негiзге алынды, сондай-ақ оқытудың мақсаттары, оқушылардың танымдық қызығушылығы, олардың қабiлеттерi, дидактикалық және жеке әдiстемелiк принциптер мен оқу пәнi деңгейiнде бiлiм мазмұнын түзу критерийлерi басшылыққа алынды.
Физиканы зерделеуге саналы қатынас шығармашылық тұлғаның қалыптасуына ықпал етеді, яғни бұл пән оқушылардың ой-өрісінің қарқынды дамуына маңызды үлес қосады, сондай-ақ эстетикалық талғамдылықты, әдемілікті, адам ойының күштілігін және оның қоршаған ортаны тану қабілетінің молдығын сезіне білуге үйретеді.
Оқу бағдарламасында жұмыстың креативті тәсілдеріне және формасына ерекше орын бөлінеді, проблемалық мәселелерді талқылау арқылы ұжымдық жұмыс жүргізу, оқушыларды өзіндік шығармашылық жұмысқа, топта бірігіп және жеке жасайтын қызықты тапсырмаларға бағыттайтын дамытушы сипаттағы шығармашылық тапсырмаларды орындау ұсынылады.